（台）今仔日看著兮NHK BS台兮節目—河流中兮王 河馬

2005.08.16

今仔日(816)因為住佇（di）咧飯店，所以會當看著一寡平常看無兮NHK BS台。拄拄仔（du-du-a）好是介紹非洲烏干達兮河馬兮故事。


我是ui節目一半zia開始看，已經di 卜（bheh） 搬煞(演了)。我看著兮部份是因為河馬兮一寡習性，所以有魚仔gah一寡鳥仔會deh di邊仔。我ma看著有一個動物學家為著bheh觀察河馬兮習性，所以愛走到有鱷魚(kok-hi)兮河內底，真是危險，ma看著二隻河馬咧鬥兮情形，ma有看著河馬gap細隻河馬囝仔鬥陣sng兮狀況。zia兮河馬到底是啥物時陣食啥物物件，我攏毋知，ma真有興趣知影，結果，in hip著河馬食物件兮時竟然是食草仔，看起來zia-ni兇兮動物，竟然主要是食草仔。

我以前聽高中地理老師講過，河馬是真有靈性兮動物，ma會幫助較細隻兮動物，伊講有一隻羊仔iah是鹿仔受傷，結果走到河邊，拄拄好有一隻河馬看著，就看顧彼隻羊仔，互其他兮獅仔等等袂當倚向伊gah伊食掉，一直到河馬無法度一定愛到河內底去鑽水，伊zia離開一su仔兮時間，彼隻羊仔suah互食去…..。





而且雖然講伊是河流中兮王，毋拘（m-gu）伊亦是(iah-si)無法度逃過人類兮毒手，佇di咧1970年代，因為烏干達內戰兮關係，所以有真濟儂無飯通食，所以食河馬來食，彼(hit)條河本底有一萬隻，到戰爭結束，已經cun無一千隻，雖然即ma有復育，ma是無法度cam像以前仝款囉。看著河邊真濟骨頭攏是所謂河流中兮王 河馬，看起來真是使儂感慨。Zia-ni有靈性兮動物，著算講有真大兮身驅gap嘴齒，，ma是無法度逃過儂兮手。因為人類政客兮私心，害人民不得不tai死hia-ni濟動物，想來ma是真悲哀兮代誌。


講著政客iah閣有gah政客比ma無好傷濟兮媒體，我就傷著媒體是按怎互咱台灣儂兮頭殼變gah按呢無法度思考代誌，對著真濟一般國家認為是常識兮代誌，台灣儂suah攏毋知。即時我著真感覺會曉其他國家語言兮好處。像

我是真愛看日本兮NHK等等兮節目，好佳哉我日文學gah閣袂bhai，所以看有zia e 日文節目，互我除了DISCOVERY節目以外，閣有一寡較有知識兮節目通看，袂看hia e台灣節目看gah變gah傷白癡…