（台）啥物號做台著袂當信基督教

2006.04.17

昨暗無細膩去看著陳雅琳di咧三立新聞台主持e台灣亮起來節目，昨是訪問豬頭皮gah介紹伊e故鄉台南市。其中主持人e介紹當中竟然有一句是按呢講兮，伊講實在是看袂出來親像豬頭皮zia-ni「叛逆」(puan-ghik，ma有儂講geh-guainn)又閣「台」e儂，竟然會是基督徒。聽著即句話我著歸腹肚火，我雖然毋是基督徒，好歹我ma知影長老教會，伊講台(是台客e簡寫，是非常侮辱台灣人e講法)已經是非常可惡(kor-onn)，閣加即句，竟然會是基督徒。伊e意思是講基督教真高尚，gan-na有講華語iah是外省儂zia會當信e是無，基督教根本著毋是按呢e宗教，竟然hit個以前TVBS e主播按呢生講，真是互儂感覺真受氣，蹧躂儂ma ai較有站節(zam-zat)兮。

即個陳雅琳deh講話中間gan-na講一句台語著是台南囡仔(ghin-a)，結果伊竟然講做台南印仔in-a去囉，真是可笑，我想伊既然bhat di咧TVBS hit種電視台做過頭路，閣來即種表面講台灣儂e電視台(實際上攏是咧蹧躂台灣儂，in e新聞台比起TVBS閣較ge-lorh)做代誌，會按呢想ma是真正常啦。

伊後來閣講著台南除了點心猶原好食以外，古蹟ma開始有變化囉。Di咧伊e心目中，台灣iah是講台南即幾字，除了食以外，啥物攏無，著只是song，用in e話著是台，真正是可惡啊。用台灣e名，sua顛倒是咧看台灣無，除了台灣e電視台以外，應該無幾個國家e儂做會出來。

毋閣即個豬頭皮ma是真害，伊互儂問講，為啥物bheh去參加520運動，伊竟然講長老教會著是hit種食飽閒閒無代誌做，所以zia會去參加社會運動。以前e豬頭皮雖然痟痟(siau-siau)，ma有真濟想法，我是塊臆(iorh)敢會是受著啥物刺激，zia會變做按呢，家己講家己是台客，「自甘墮落」看家己無。