（台）鶴佬儂想卜做外省儂

2006.04.17

我昨日去參加阮一貫道di咧桃園e細間佛堂e班，早時是囡仔e讀經班，拄仔好我去e時陣是in下課。我看著大儂互相講話e時是用台語，毋閣對囡仔講話e時，著攏是用華語，逐家攏袂感覺真奇怪。閣較濟e狀況是阿媽為著卜（bheh） gah孫仔講話，sua顛倒ai去學華語。真是悲哀，可憐。

我gah朋友講著zit項代誌，阮是認為這是因為台灣e hoklor儂想卜做外省儂。所以in對市面上gan-na有華語e卡通ham童話冊攏袂感覺有啥物奇怪，認為真自然。另外一方面，對只會曉講台語e囡仔，用真濟汙辱e話來罵，比如講阿宏e故事。是一個阿媽ciann養大漢e囡仔，竟然認為伊袂曉講華語是罪大惡極(zue-dai-ok-gik)。我認為若是台灣e通用話之一是hoklor話，伊e母語顛倒是伊e資源。Deh以前，阿宏以後會當用伊e母語來gah真濟儂交際講生理，佇咧文化知識經濟e時代，deh學校伊得袂著成就感，若無著是ai放棄伊e母語，因為deh學校這是無路用e物件，著只有一節課會上著nia-nia。

台灣e hoklor儂，因為六十年e殖民，已經對zit種國語是上位語言e狀況真慣習，並且真認同。比起原住民ham客人，in zitma有電視台gah委員會deh復興in e語言，咱hoklor儂sua想bheh緊gah hoklor語消滅，所以無幾個儂e有心用心教囡仔hoklor話，希望in會當緊gah hoklor話放袂記，通好緊倚向主流e華語。Hoklor比起一寡原住民gah客人，更加想卜緊gah家己e母語放掉。

這著是被殖民者e悲哀，一旦殖民體制建立起來，顛倒是被殖民者會比殖民地者閣較熱情擁護殖民體制，真是悲哀。